Ял көндәре мәләүездәр өсөн дә хафалы үтте. Яңыраҡ Һәргәй ауылы янында ут сыҡҡайны, был юлы Александровка ауыл биләмәһендәге утар янында янғын күҙәтелде. Ярай ваҡытында халыҡ күтәрелде, унан ярҙам да килеп етеп, урман да, ауыл да ҡотҡарылды.
Шул уҡ ваҡытта янғындар һаман дауам итә, балаларҙың ут менән шаярыуы, һүндерелмәгән тәмәке төпсөгө, усаҡ ҡуҙы, быяла ярсығы ла быға сәбәпсе булыуы ихтимал.
Аномаль эҫелек тә йонсотто, ололар, хроник ауырыуҙар бигерәк ауыр кисерә - барыһы ла һауа температураһының төшөүен, ямғыр яуыуын көтә. Гисметео мәғлүмәте бер аҙ тынысландыра, был аҙнала һауа температураһы түбәнәйә башлай. Аҙнаның тәүге яртыһында көндөҙ +32, +35 градус эҫе була. Йомаға термометр бағанаһы көндөҙ 28 градусҡаса түбәнәйә, төндә һалҡынайта. Урыны менән ямғыр һәм йәшен фаразлана. 28 һәм 29 августа көндөҙ - +20, төндә+13, +16 градус. Шулай ҙа үҙебеҙгә лә иғтибарлы булыу, һаҡлыҡ сараларын күҙәтеү зарур.