1996 йылдан 22 июнь - Хәтер һәм ҡайғы көнө булараҡ билдәләнә. Был дата халыҡ күңелендә утлы яра булып мәңге ҡаласаҡ, ул бер ваҡытта ла онотолорға тейеш түгел.
Һыртлан ауылы клубында Советтар Союзы Геройы Садиҡ Уйылдан улы Сайрановҡа бағышланған «Иҫләйбеҙ... Ғорурланабыҙ...» исемле хәтер кисәһе үтте. Батыр һәйкәленә сәскәләр һалып, бер минут тынлыҡта иҫкә алғас, митингыла ҡатнашыусылар яуҙан ҡайта алмаған ҡаһармандар рухына аят тыңланы.
Кисәгә Садиҡ Уйылдан улының туғандары, Мәләүез район-ҡалаһының Төньяҡ Кавказда хәрби бәрелештәрҙә ҡатнашҡан Батальон ойошмаһы, танк ғәскәрҙәре һәм Варшава илдәре килешеүенең ветерандар ойошмаһы саҡырылды. Йәнле әңгәмә, шиғыр, йырҙар менән үрелеп барған сарала герой тураһында хәтирәләр иҫкә алынды. Урындағы ҡоролтайҙың ир-егеттәр ҡоро етәксеһе, танк ғәскәрҙәре ветерандары ойошмаһы рәйесе Фәнис Бикташев ошондай сараларҙың бик аҙ ойошторолоуын, мәктәп балаларын күберәк йәлеп итергә кәрәклеген һыҙыҡ өҫтөнә алды.
Эйе, бындай саралар мотлаҡ уҙғарылырға тейеш, әммә халыҡ кемдер саҡырғанға түгел, ә күңел ҡушыуы буйынса килһен ине...
Беҙҙең батыр
Һаумы, Садиҡ ағай,ҡайттыңмы ни?
Тәбрикләргә килдем үҙеңде.
Батырлығың алдында баш эйәмен,
Еткерәмен рәхмәт һүҙемде.
Нисә тиҫтә йылдар үткәндән һуң
Яу яландарынан ҡайттың һин.
Тыуған ауылың - Һыртланыңа ҡайттың
Мәңге тере ҡалыр һәйкәл-һын.
Яугир батырҙарҙың төҫө һәйкәл,
Хәтерләтә һуғыш йылдарын.
Килер быуындарға даны ҡалһын
Онотмайыҡ халыҡ улдарын!
Ғәйшә Арыҫланбаева, ветеран уҡытыусы.
Эйе, батырыбыҙ онотолорға тейеш түгел! Хәтер кисәһенән һуң ойошторолған сәй табынында ла һүҙ ошо турала барҙы. Ни өсөн Һыртлан ауылында бер урам да геройыбыҙ исемен йөрөтмәй? Төрлө тәҡдимдәр, фекер уртаҡлашҡандан һуң Фәнис Әлимғол улы ауылдың башланғыс мәктәбенә Садиҡ Сайранов исемен бирергә кәрәк тигән тәҡдим индерҙе. Уны барыһы ла хуплап сыҡты, мәғариф бүлеге һәм район хакимиәтенә мөрәжәғәт итергә тигән һығымтаға килеп таралдылар.
Миңлегөл БУРАНҒОЛОВА.
Автор фотоһы.