Хәйерле ҡышҡы иртә менән

Февраль аҙағы, ҡыш һуңғы көндәрендә ысын ҡышҡы һалҡындар менән һөйөндөрә. Эйе, алда яҙ, аҡлыҡ-сафлыҡ һағындырыр әле. Һәр миҙгелде үҙ үҙенсәлеге биҙәй. Дөрөҫ, һуңғы осор ҡышҡы ямғыр ҙа, йәйге ҡар ҙа беҙҙе аптыратмай. Ә бына Бөйөк Ватан һуғышында блокаданан йонсоған Ленинградты инде теҙләндерҙем тигәндә ҡаланан өс-дүрт саҡрымда ғына туҡталған немец илбаҫарҙарынан нәҡ Рәсәйгә генә хас сатлама һыуыҡтар халыҡты ҡотҡара. Ул ваҡыттағы һалҡындарҙы "төкөрөк ергә төшөп еткәнсе туңа ине" тип ҡылыҡһырлайҙар.