Ҡала мәҙәниәт һарайында “Дуҫлыҡ” халыҡ театры уңышлы эшләп килгәне һәр кемгә мәғлүм. Яңыраҡ ижади коллектив балалар өсөн А.С. Пушкиндың “Алтын балыҡ” әкиәтенең башҡортса вариантын сәхнәгә ҡуйҙы. Музыкаль композициялар менән үрелеп барған ваҡиғалар кескәйҙәр һәм үҫмерҙәрҙең күңеленә хуш килде. Тамаша ноябрь айына тиклем күрһәтеләсәк. Әкиәтте урыҫсанан башҡортсаға Хәлиҙә Шәйәхмәтова тәржемә иткән. Уҙған аҙнала халыҡ театры Нәжиб Асанбаевтың “Бер йәшлектә, бер ҡартлыҡта” спектаклен бушлай ҡуйып, мәләүездәрҙе һөйөндөрҙө. Былтыр иһә улар йыл дауамында Сәлмән Яҡуповтың “Уяна алһам, әгәр” пьесаһын сәхнәгә сығарғайны, тиҫтәләгән ауылда гастролдәр үтте. Халыҡ театры артистары 1, 9 май байрамдарында, һабантуйҙа ҡатнаша.
Коллективты һәләтле, оҫта режиссер Гөлзилә Вәлиева етәкләй. Театрҙың иң әүҙем артистарын билдәләге килә: Альберт Фазлаев, Фәрзәнә Иманғолова, Фәнис Абдрахманов, Хәлиҙә Шәйәхмәтова, Фәрғәт Зәйнәғәбдинов, Азамат Тайыпов, Эльза Үмәрғәлина.
Байрам уңайынан сәнғәт оҫталарын ихлас ҡотлап, уңышлы ижади юл теләйбеҙ.