Тик ыңғай энергетика бөркөлөп торған кешеләр менән аралашҡанығыҙ бармы? Уларға күңел үҙе тартыла, ойоштороу һәләте лә күктән бирелгән кеүек уларға. Яҡындарына ғына түгел, таныш булмағандарға ла ярҙам ҡулы һуҙыу - уларҙың ғәҙәте.
Миҫалға, Восточный ауылында йәшәгән Зәйлә Әлмөхәмәтова ауылдаштарын скандинав таяғы менән йөрөүгә әүҙемләштергән.
Ысынлап та , мал-тыуарҙы ҡарап ингәс, күптәр диванға ҡырын ятып, шул “ҡара йәшник”кә төбәлә, кәрәкме-кәрәк түгелме ундағы мәғлүмәтте үҙенә һеңдерә, кино артистарының тормошо менән йәшәй башлай. Үҙебеҙгә бүләк итеп бирелгән ғүмеребеҙҙе заяға уҙғарабыҙ. Бер уйлаһаң, ауылда әллә ни шөғөл дә юҡ һымаҡ. Ә Зәйлә апай уҡыусы балаларҙан алып өлкәндәргә тиклем сәләмәт тормош юлына баҫтырған. Башта үҙе башҡаларға өлгө күрһәткән. Ауылдаштарына өгөт-нәсихәт тә кәрәк булмаған. Бөгөн сәләмәт юлға баҫҡан востоктар 10 километрға яҡын юл үтә. Саф һауала йөрөп ҡайтҡандан һуң, кәйеф тә күтәрелә, шул уҡ ваҡытта үҙ-ара аралашыуҙан кинәнес алаһың.
Афарин, Зәйлә Рафиҡ ҡыҙы!