Республикала йәшәүселәрҙең эш хаҡы 11 процентҡа артасаҡ

Беренсе вице-премьер Рөстәм Моратов алдағы өс йылға социаль-иҡтисади үҫеш прогнозын тәҡдим итте. Ул Башҡортостан Дәүләт Йыйылышында доклад менән сығыш яһаны, унда халыҡтың реаль килеме үҫеше уртаса сроклы перспективала 103-104,6 процент тәшкил итәсәк, тип белдерҙе. "Республикала 2026-2028 йылдарҙа йыл һайын эш хаҡының 7-11 процентҡа артыуы күҙаллана. 2028 йылда төбәктә уртаса айлыҡ эш хаҡы 98 мең һумға етәсәк», — тип билдәләне Моратов. Министрлыҡта 2026 йылдың 1 ғинуарынан минималь эш хаҡының 20,7 процентҡа артыуы килем динамикаһына ҙур йоғонто яһаясаҡ тип иҫәпләйҙәр. Был бюджет өлкәһендәге 93 мең самаһы хеҙмәткәргә ҡағыласаҡ һәм уртаса Рәсәй күрһәткестәренән артта ҡалыуҙы кәметергә мөмкинлек бирәсәк. Прогноз ағымдағы иҡтисади тенденцияларҙы һәм төбәк иҡтисадын үҫтереү буйынса пландарҙы иҫәпкә ала.