Ҡыҫала тотоу фестивале күңелле үтте

Сараны тантаналы асып, эшҡыуарлыҡ һәм туризм буйынса республика дәүләт комитеты, БР Туризм үҫеше үҙәге һәм “Иштуған” мәҙәни-балыҡсылыҡ хужалығы тарафынан “түңәрәк өҫтәл” ойошторолдо. Бында туризмды үҫтереү буйынса актуаль мәсьәләләр ҡаралды. Ғаилә менән әүҙем ял итеүҙе популярлаштырыуға йүнәлтелгән был саралала ҡунаҡтар ҡатнашыусыға әүерелде. Көндөң эҫе булыуна ҡарамаҫтан ойоштороусылар тематик һәм ижади оҫталыҡ дәрестәре, экологик һәм туристик квестар, күңел асыу һәм белем биреү программалары, күргәҙмәләр әҙерләгән ине. Балалар төрлө уйындарҙа теләп ҡатнашты. Ҡыҫалаларҙың ярышы ла бик мауыҡтырғыс күренеш булды. Бынан тыш, фестивалдең символы - «Ҡыҫала» арт-объектын ағастан Өфөнән килгән ҡул оҫтаһы Руслан Ҡауыев эшләне.

«Бөгөнгө заманда эш менән генә мәшғүл булған атай-әсәйҙәр балалары менән ял итеп, күңел асыр өсөн ойошторолдо был фестиваль», - тине фестивалде ойоштороусы Сергей Колесников. Байрамдың төп өлөшө кискә тура килде, унда ҡыҫала тотоп, бешереп күрһәтеү һәм тәмләп ҡарау мөмкинлеге булды. Шулай уҡ Мәләүез үҙэшмәкәр артистар әҙерләгән концерт программаһы тәҡдим ителде. Сара аҙағы йомғаҡ яһау һәм бүләкләү менән тамамланды.