Ринат Бикбулатов, ауыл хужалығы бүлеге етәксеһе:
- Ир-атты ғүмер буйына ҡатын-ҡыҙҙың гүзәллеге, наҙы, игелеге үҙенә тартып тора. Бала тыуҙырыу - илаһи мөғжизә, шул рәүешле әсә кеше кешелекте, балалар һәм ейән-ейәнсәрҙәр аша мәңгелеккә илтә. Мин идеаль ҡатын-ҡыҙҙың камил образын әсәйемдә күрҙем.
Әсәйем Нурия Әхмәтшәриф ҡыҙының баҡыйлыҡҡа күсеүенә тиҫтә йылдан ашыу. Ул өс балаһына ла юғары белем бирҙе, характер тәрбиәләне, кешелекле итеп тәрбиәләне. Ҡатын-ҡыҙ сабыр булырға тейеш, тип уйлайым. Тормош иптәшем Роза Рәшит ҡыҙы һөнәре буйынса педагог. Дүрт бала тәрбиәләнек. Замана ҡатын-ҡыҙы булараҡ, ул тәмле итеп ашарға ла бешерә, ҡул эштәренә оҫта. Ике ҡыҙым да тыңлаусан, өлкәндәрҙең кәңәшен ситкә типмәй (ул бик яҡшы сифат), эштәрен урынына еткереп башҡара. Гүзәл ҡатын-ҡыҙҙарыбыҙға байрам уңайынан иҫәнлек-именлек теләйем!