МӘҢГЕЛЕК ДАН ҺИҢӘ, РИВАЛ!

5 сентябрҙә мәләүездәр махсус хәрби операцияла һәләк булған яҡташы Ривал Кәлимуллин менән хушлашты. 

Яугирҙе һуңғы юлға оҙатыу сараһында һалдаттың яҡындары, район хакимиәте башлығының социаль мәсьәләләр буйынса урынбаҫары Геннадий Шлычков, Мәләүез ҡалаһы, Мәләүез һәм Федоровка райондары хәрби комиссары Олег Тройно, йәш армиясылар, йәмәғәт ойошмалары вәкилдәре ҡатнашты.

Ривал Рәфҡәт улы 2001 йылдың 1 октябрендә Восточный ауылында тыуған. Мәләүездә, һуңынан Стәрлетамаҡ ҡалаһының 54-се һөнәрселек училищеһын автомеханик һөнәре буйынса белем ала.

2024 йылдың 11 майында үҙ теләге менән махсус хәрби операцияға китә. 1 августа, хәрби бурысын үтәгәндә, Донецк Халыҡ Республикаһы биләмәһендә батырҙарса һәләк була.

Уның яуҙа күрһәткән ҡаһарманлығы үҙе һәләк булғандан һуң «Батырлыҡ» ордены менән баһалана.  

Һуңғы һулышынаса Ватанын һаҡлаған йәш яугирҙең йәне йәннәттә булһын. Ҡыйыу һәм тәүәккәл Мәләүез егете яҡташтарының хәтерендә мәңге йәшәр. 

Автор фотолары.