ҮҘ КӨСӨНӘ ИНӘ РАМАҘАН

Көн тамамланыуын бәйән итеп
Күк эңерҙе шәфәҡ ялмаған.
Алһыу шәфәҡ ҡыйған аҡ биләүҙә
Ай нурында тыуа Рамаҙан.

Ҡыйырсыҡ ай ғына Рамаҙандың
Тәғәйенләнеше олонан -
Бәндәләрҙе әйҙәп алып барыр
Хаҡ Тәғәлә һыҙған юлынан.

Изге Рамаҙанда ураҙабыҙ
Аллаһ рәхмәтенә бер ғәмәл.
Аҡландырһын, пакландырһын бер үк,
Фарыз ғына булған был әмәл.

Шикһеҙ ҡабул булыр ураҙалар -
Ниәттәрҙе ихлас теләйек.
Бер Аллаһты ихлас һөйәйек тә,
Барлығын, берлеген беләйек.

Бәндәләрҙең аңы, йәне, тәне,
Таҙарынһын өсөн сүп-сарҙан,
Үҙ көсөнә инә, мосолмандың,
Изге генә айы- Рамаҙан.