Көн менән төн алышынып,
Аҙналар, айҙар аға.
Һиҙҙермәйсә тағы бер йыл
Үтеп тә китеп бара.
Был йыл бик үҙенсәлекле:
Тажлы һәм кодлы булды,
Бығаса ишетелмәгән
Закондар тыуып торҙо.
Декабргә аяҡ баҫтыҡ,
Мөғжизә көтә күңел!
Ауыр тоҡло Ҡыш бабабыҙ
Беҙҙең өсөн ят түгел.
Бала саҡтан көтөп алдыҡ
Уның һәр бер килеүен,
Ихлас итеп сәпәкәйләп
Беҙгә ҡарап көлөүен.
Иңендәге тылсым тоғо
Ҡыҙыҡһындырҙы барын,
Ошо тоҡто астырырға
Тиҙ таба инек яйын.
Кемдер бейей тыпыр-тыпыр
Дәртле гармун көйөнә,
Йырлап алған тәмлекәскәБарыһы ла һөйөнә.
Ҡыш бабабыҙ! Бөгөн һиңә
Күбәйҙе әйтер һүҙҙәр!
Өмөт бағлап һиңә ҡарай
Күр әле, күпме күҙҙәр!
Һин, Ҡыш бабай, ҡайтар беҙгә
Элеккесә йылдарҙы!
Ҡышын яуҙыр (беҙ көтәбеҙ!)
Ябалаҡлап ҡарҙарҙы!
Яҙ ҙа килһен ваҡытында,
Ташһын шашып йылғалар,
Һағынышып, һуңламайса,Ҡайтһын аҡҡош, торналар!
Йәйҙәр күңелде күтәрһен,
Йылы ямғырҙар яуһын,
Йәйғор ҡалҡһын, бер ҡазаһыҙ
Йәшен гөрһөлдәп уҙһын!
Көҙөн ырҙын табағында
Алтын өйөмдәр ҡалҡһын!
Тыныс, матур был тормошта
Балалар тыуып торһон!
Эй, Ҡыш бабай! Яңы йылың
Төклө аяҡлы булһын!
Һәр беребеҙҙең иңенә
Бәхет һәм ырыҫ ҡунһын!