Сәкинә ТОТМАНОВА шиғыры

Хаталаныу бында мөмкин түгел,
Һинең һүҙең һәр саҡ хаҡ һымаҡ.
Теләгәндә бында мин хужамын,
Ә ҡайсаҡта - затлы ҙур ҡунаҡ.

Бында көслө булыу мөһим түгел,
Белмәһәң дә, ғәйеп итмәҫтәр.
Һине иң хөрмәтле кеше күреп,
Яңғыҙыңды ташлап китмәҫтәр...

Телефондың һис тә кәрәге юҡ...
Иң яҡындар һинең яныңда.
Төн йоҡолар бында үтә тәмле,
Торғо килмәй әле таңын да.

Өйгә ҡайтам... Ҡайтам асылыма.
Бер хәйләһеҙ бала сағыма...
Ошо бәхет ташламаһын ине,
Оҙаҡ - оҙаҡ йылдар тағы ла!