ҠАРАЛАМА ҺӨЙГӘНЕҢДЕ

Һөйгәнеңдең яҡтарынан
Иҫһәләр һыуыҡ елдәр,
Һағышыңды йәйге елдә
Яланға сығып елгәр.

Селләләр булып көйрә лә
Ҡойондар булып ҡойол,
Тик аҡылһыҙ үс алыуҙан -
Меҫкен ҡалыуҙан тыйыл.

Ирәмәлдәй күккә аш та
Шүлгәндәй ергә уйыл,
Тик һөйгәнең күңеленән
Аҡтан-аҡ килеш юйыл.

Сафтарҙан-саф килеш юйыл,
Ҡалмаһын һинән хатта,
Әгәр ысыҡ булып тамһаң
Эҙ ҙә таңғы япраҡта.

Ҡаралама һөйгәнеңде -
Ул да ҡалһын аҡ көйө.
Йәшәһен ерҙә мөхәббәт
Ялған түгел, хаҡ көйө

Рәмзилә ХИСАМЕТДИНОВА.