Оло йөрәкле, ҡыйыу ул

Донъяла сәләмәтлектән дә ҡәҙерлерәк бер ни ҙә юҡ. Ә кеше һау­лығын ҡайғыртыусы, хәл-торошон еңе­ләйтеү­се “аҡ халатлы”ларҙың хеҙ­мәте оло баһаға лайыҡ.

Ауылдарҙа элек-электән медпункттар эшләп килә. Халыҡ өсөн ул изге йортҡа тиң, тиһәм арттырыу булмаҫ. Тормошта ниндәй генә хәлдәр тыумай. Кеше ҡапыл ауырып китә, фажиғәле осраҡтар ҙа юҡ түгел. Шул саҡта бөтәһе лә тәү сиратта фельдшер-акушерға ашы­ға. Былар яҙасаҡ героиням Рәйсә Абзал ҡыҙы Шә­һимәрҙәноваға яҡшы таныш. Медицина өлкәһенә ҡырҡ йылдан ашыу ғү­мерен бағышлаған хеҙмәткәр­ҙең иңендә күпме пациент ҡабул итеү, яр­ҙам күрһәтеү, кеше ғүмерен һаҡлап ҡалыу. Алтынсы класта уҡығанда уҡ буласаҡ һөнәрен аныҡ билдәләгән Рәйсә ха­ным – мотлаҡ врач булырға. Әммә яҙмышы уға үҙ һынауҙарын әҙер­ләп ҡуя. Йәшләй генә ата-әсәһен ер ҡуйынына һала ул. Хы­ялын тулыһынса тормошҡа ашыра алмаған тип әйтеүе урынһыҙ кеүек, сөнки ауылда ул универсаль табип бурыстарын теүәл үтәй. Ауыл фельдшерының эше ябай түгел. Йоҡоһоҙ төндәренең, ялһыҙ көндәренең иҫәбе-хисабы юҡ. Уға ышанып тапшырылған кешеләрҙең сәләмәтлеге, ғүмере өсөн яуаплылыҡ тойғоһо менән йәшәргә, һәр ваҡыт әҙер булырға кәрәк. Ысын мәғәнәһендә оло йөрәкле, ҡыйыу ҡатын ул. Тормошта күңелһеҙ осраҡтар ҙа байтаҡ. Күпме кешенең ғүмерен һаҡлап ҡалғандыр, билдәһеҙ. Элекке ваҡытта кеҫә телефоны ла, кәрәкле аппарат, йыһаз, транспорт та юҡ. Рәйсә Шәһимәрҙәнова белеменә, тәжрибәһенә таянып, һәр саҡ дөрөҫ диагноз ҡуя, кәрәкле дарыуын эсерә, укол ҡаҙай, ҡатындарҙың йөклөлөк осорон билдәләй, иҫәпкә ҡуя, балаһын тапҡансы күҙәтә, профи­лактик саралар үткәрә. Ни тик­лем ҡыйын­ға төшһә лә, ҡатмарлы хәлдәрҙә ул ҡаушап ҡалмай, һалҡын аҡыл менән етеҙ һәм дөрөҫ эш итә. Тән һыҙлауы менән яфаланғандарға шифа булыр­ҙай һүҙҙәр табып йыуата, ышаныс уята. Ярҙам һорап, өмөт бағлап, күҙ төбәп килгәндәрҙең һәр береһенә яғымлы ҡарашын, йылы һүҙен йәлләмәй ул.

- Эшем ауыр тип бер ҙә зарланманым. Кире­һенсә, кешеләргә ярҙам итә алғаным, өмөттәрен аҡлағаным өсөн шатмын, үҙемдән һәм һөнәремдән ҡәнәғәтмен. Ҡасандыр ҡабул иткән бәпестәрем үҙҙәре өләсәй-олатай. Уларҙы күреп ҡыуанам. Заманында үлем осрағынан йолоп ҡал­ған пациенттар күргән һайын рәхмәтен, изге теләктәрен белдерә. Минең өсөн был оло бәхет, - ти Рәйсә ханым. – Һөнәреңде ысын күңелдән яратһаң, бирелеп эшләһәң, тырышһаң ғына уңышҡа өлгәшеп була.

Рәйсә Шәһимәрҙәнова хаҡлы ялға сыҡҡансы байтаҡ йылдар Тамъян фель­дшер-акушер пунктында эшләй. Әле лә йәштәр менән тәжрибә уртаҡлаша. Ярҙам, кәңәш һорап килгәндәр ҙә аҙ түгел. Берәүҙең дә үтенесен кире ҡаҡмай. Рәйсә Абзал ҡыҙының хеҙмәт юлы хөрмәткә ла­йыҡ. Һайлаған һөнәренә тоғро ҡалған, белемле, аҡыллы, шәфҡәтле хеҙмәткәрҙең үҙенә лә ныҡлы сәләмәтлек, рух ныҡлығы, йән тыныслығы теләге килә.