Йәшәүгә табан 10000 аҙым атла!

Бөгөн ҡаланың «Дан» мәҙәни-ял паркында "Йәшәүгә табан -10000 аҙым" Бөтә Рәсәй акцияһы сиктәрендә спорт сараһы ойошторолдо. Ул Бөтә донъя һаулыҡ көнө айҡанлы үтә. Халыҡты спортҡа һәм сәләмәт тормошҡа ылыҡтырыуға арналған спорт сараһында үҙ һаулығын хәстәрләгән һәм спорт яратҡан балалар, үҫмерҙәр, спорт клубы тәрбиәләнеүселәре, скандинав йөрөүе менән шөғөлләнеүселәр, әүҙем ҡала йәштәре һәм ололар ҡатнашты.

Сараны район хакимиәтенең физик культура һәм спорт секторы мөдире Евгений Корнюшкин асып, "Йәшәүгә табан-10000 аҙым" Бөтә Рәсәй акцияһында ҡатнашыусыларҙы сәләмләгәндән һуң, йәйәү йөрөү хәрәкәтенә старт бирелде.

Байтаҡ сирҙең тап аҙ хәрәкәтләнеү сәбәпле барлыҡҡа килеүе билдәле. Йәйәү йөрөү ашҡаҙан-эсәк эшмәкәрлегенә ыңғай йоғонто яһай, йөрәк-ҡан тамырҙары ауырыуҙарын иҫкәртә, кәүҙәнең дөрөҫ һәм сәләмәт торошона булышлыҡ итә.

Һуңғы йылдарҙа ҡала урамдарында скандинавса хәрәкәтте үҙ иткәндәр, эштән һуңғы ваҡытын йәки ял көндәрен йәйәү йөрөп үткәреүселәр һаны арта бара. Үҙ сәләмәтлеген нығытырға, оҙон ғүмерле булырға теләүселәр өсөн йәшәүгә табан 10000 аҙым яһау бер ниндәй ауырлыҡ тыуҙырмай.      
Спорт сараһы һуңында ҡатнашыусыларға сертификаттар тапшырылды, унан һәр кем яҡшы кәйеф, ыңғай тәьҫорат менән таралды.

Автор фотолары.