"Ысыҡҡай"ҙа көҙгө йәрминкә

Көҙгө муллыҡ байрамы

Мәктәпкәсә белем биреү учреждениеһында йолаға әүерелгән йәрминкә ысын мәғәнәһендә байрамға әүерелде. Унда  балалар баҡсаһы хеҙмәткәрҙәре, тәрбиәләнеүселәр һәм ата-әсәләр ҡатнашты.
Йәрминкәлә алтын көҙ айының мул уңышы - йәшелсә һәм емеш-еләк, төрлө тәмлекәстәр, кәнфит-печенье, милли ризыҡтар, уйынсыҡтар һатылды.

Сара хәрәкәт уйындары менән аралаштырылып күңелле үтте. Балалар япраҡтар бейеүен башҡарҙы, күмәкләп түңәрәктә өйөрөлдө, арҡан тартышта көс һынаны, иң бәләкәстәр хатта үҙ ансамблен булдырып өлгөргән! Атай-әсәйҙәргә, мәҫәлән, уларҙың музыкаль һыбыҙғыла уйнауы оҡшаны. Өлкән төркөм  тәрбиәләнеүселәре “Тыуған яҡ” йырын башҡарғанда атай-әсәйҙәр ҙә ҡушылып йырланы һәм бейене. Байрам сағыу һәм онотолмаҫ тәьҫорат ҡалдырҙы.  Асыҡ һауала үткән сара, йәрминкәгә йәм өҫтәгән мәҙәкселәрҙең кәйефе балаларға ла күсте.