Сираттағы Хакимиәт көнө Воскресенский ауыл биләмәһендә үтте

Беренсе мәғлүмәт төркөмө етәкселәре халыҡ менән ауыл мәҙәниәт йортонда осрашты

Воскресенский ауыл биләмәһе башлығы Сергей Кувайцев үҙенең сығышында үткән йылға йомғаҡ яһап, тыуым һәм үлем буйынса статистика мәғлүмәтенә туҡталды. Айырым ҡаҙаныштарҙы билдәләп, быйылға пландар менән уртаҡлашты.

Район Хакимиәте башлығы Рөстәм Шәмсетдинов та үткән йылға йомғаҡ яһап, 2018 йылға пландар менән таныштырҙы. Төрлө программаларҙа ҡатнашырға кәңәш итте. Ауыр тормош шарттарында ҡалған етем балаларға 11 фатир төҙөләсәген әйтеп үтте. Район дауаханаһының баш табибы алмашыныуын, электрон регистатура эшләй башлауын, яңы йәш белгестәрҙең эшкә килеүен билдәләне. Ауылда автостанция (павильон) булдырыу, Мәләүездең шәхси секторҙарынан сүп-сар килтереп ташлауына зарланыусылар, шулай уҡ медицина ярҙамын күрһәтеү буйынса һорауҙар яңғыраны. Мәғлүмәти төркөм вәкилдәре һорауҙарға яуап бирҙе, ҡайһы берҙәрен тикшереү маҡсатында иҫәпкә алдылар. Осрашыуҙы ауыл мәҙәниәт йорто артистары концерт номерҙары менән биҙәне.

Ҡабул итеүҙән һуң халыҡҡа мәғлүмәт төркөмө етәкселәре менән яҡындан аралашыу форсаты тейҙе.

Һүрәттә: ауыл халҡы үҙҙәрен ҡыҙыҡһындырған һорауҙарға яуап алды.
Автор фотоһы.