Һаулыҡ һаҡлауҙа етдилек зарур

Район Хакимиәте башлығы Рөстәм Шәмсетдинов район үҙәк дауаханаһының хирургия, травматология, психотерапия, кардиология бүлектәрендә булды. Сараның маҡсаты - халыҡҡа медицина хеҙмәте күрһәтеү сифаты, ремонт эштәре барышы, мөһим медицина ҡорамалдары менән тәьмин ителеүе менән яҡындан танышыу.

Бөгөн дауаханала “Асыҡ регистратура”эшләй, белгестәргә яҙылыу өсөн уңай шарттар булдырылған. Үҙәк дауаханала 166 врач, 735 урта медицина хеҙмәткәре иҫәпләнә, әммә уларға ҡытлыҡ күҙәтелә. Был, әлбиттә, хеҙмәтләндереү сифатында сағылыш таба. Йыл башынан 14 врач килгән (12 медицина хеҙмәткәрен хаҡлы ялға оҙатҡандар, бер нисәүһе уҡыуын артабан дауам итергә теләгән, эшҡыуарлыҡты һайлағандар ҙа бар), бөгөн штатты йәш кадрҙар менән тулыландырыу буйынса килешеүҙәр төҙөлгән. 2016 йылдан урындағы бюджет иҫәбенә 7 белгескә фатир тапшырылған. Шулай уҡ Иштуған, Партизан фельдшер-акушерлыҡ пункттарына ремонтҡа район бюджетынан 1 миллион һум аҡса бүленгән.