Онкология – заман афәте

Быйыл “Һаулыҡ” проектын ғәмәлгә ашырыу дауам итә. Республикала дүрт онкология үҙәге асыла. Был турала Башҡортостандың һаулыҡ һаҡлау министры Максим Забелин хәбәр итте. Республика Һаулыҡ һаҡлау министрлығы башлығы һүҙҙәренсә, хәҙер яман шеш ауырыуҙарын диагностикалау өсөн аппаратураның иҫкереү проблемаһы бар. Әлеге мәлдә 60-70 проценты – иҫке. Яйлап яңыртыла. Республика компетентлы кадрҙарға ла мохтаж. Максим Забелин һүҙҙәренсә, бөгөн 120 онколог етмәй. 2020 йылда 30 белгестең килеүе көтөлә. Башҡортостанда яман шештәрҙе асыҡлау осраҡтары арта.

Белгестәр онкологик сирҙәргә килтергән сәбәптәр араһында элеккесә экологияның бик насар хәлдә булыуын, кешенең туҡланыуын, тәмәке тартыу һәм алкоголь ҡулланыу кеүек насар ғәҙәттәрҙе, генетик бирешеүсәнлекте билдәләй.