Татлыларҙан татлы байрам

Кем бер тапҡыр булһа ла, Бал байрамында булһа, ул мотлаҡ икенсе йыл да барасаҡ.

Фестиваль барған биләмәгә инеү менән шундай һөйләшеүгә шаһит булдым. Ысынлап та, ҡайһылай дөрөҫ әйтәләр. Мин дә, ял көнө булыуға ҡарамаҫтан, ҙур теләк менән юл тоттом байрамға. Өсөнсө йыл рәттән ойошторолған сара быйыл “Спартаковсы” балалар лагеры янында йәмле Нөгөш һыуһаҡлағысы ярында үтте.

Унда республиканың көньяҡ райондарынан, атап әйткәндә, Күгәрсен, Көйөргәҙе, Федоровка, Ейәнсура, Мәләүез һәм Бөрйәндән ҡырҡтан ашыу умартасы ҡатнашты. Бал миҙгелен йомғаҡлауға арналған сарала ҡортсолоҡ менән шөғөлләнеүселәрҙе район Хакимиәте башлығы Рөстәм Шәмсетдинов, “Башҡортостан” милли паркы етәксеһе Владимир Кузнецов сәләмләне.

Һөнәри конкурста Әлфир Уразбахтин, Ринат Тимерәев (икеһе лә Мәләүездән), Илгиз Шәрипов (Түбәнге Таш) еңеүсе исемен яуланы. “Иң тәмле бал” номинацияһында Мөдәллимә Хасбутдинова билдәләнде. Үҙешмәкәр артистар умартасыларға арнап иң матур йырҙары, бейеүҙәре менән сығыш яһаны.