Башҡортостан Республикаһының ауыл хужалығын консультациялау Үҙәге вәкилдәре йыл башынан 23 муниципаль районда күсмә семинар-кәңәшмә үткәрҙе. Ауыл муниципалитеттарында йәшәүселәргә дәүләт ярҙамы саралары, «Агростартап», «Ғаилә фермалары», «Агропрогресс», «Матди-техник базаны үҫтереү» программалары буйынса гранттар алыу шарттары, ғариза биреүселәргә төп талаптар һәм ҡануниәттәге һуңғы үҙгәрештәр хаҡында һөйләнеләр. Осрашыуҙа 850-нән ашыу кеше ҡатнашты.
Улар араһында ауыл хужалығы ҡулланыусылар кооперативтары рәйестәре, крәҫтиән-фермер хужалығы етәкселәре, шәхси ярҙамсы хужалыҡтар, район хакимиәте башлыҡтарының ауыл хужалығы буйынса урынбаҫарҙары, шулай уҡ ауыл биләмәләре башлыҡтары һәм муниципаль райондарҙың ауыл хужалығы бүлектәре белгестәре ҡатнашты. Сараның төп маҡсаты - республикала эшкәртеү продукцияһының күләмен арттырыу һәм ауыл халҡына йыл әйләнәһенә өҫтәмә килем алыу өсөн граждандарҙы ауыл кооперацияһына һәм фермерлыҡҡа йәлеп итеү, - тине БР ауыл хужалығын консультациялау Үҙәге директоры Ирек Сакаев.
Иҫегеҙгә төшөрәбеҙ, дүрт йыл эсендә Башҡортостан Республикаһының агросәнәғәт комплексында бәләкәй һәм урта эшҡыуарлыҡҡа дәүләт ярҙамы өсөн 1 миллиард 108 миллион һумдан ашыу аҡса бүленде. Һөҙөмтәлә 272 яңы фермер хужалығы булдырылған, 82 ауыл хужалығы ҡулланыусылар кооперативына ярҙам күрһәтелгән, ә ҡулланыусылар кооперацияһына 7,8 мең яңы ҡатнашыусы йәлеп ителгән. Башҡортостан агросәнәғәт комплексының бәләкәй хужалыҡ формалары өсөн гранттар һәм субсидиялар алыу шарттары буйынса тулыраҡ мәғлүмәтте https://cckrb.ru/programs/ һылтанмаһы буйынса табырға мөмкин.