Туған тел һаҡсылары

Бик матур байрамда булып ҡайттым әле.

Һарыш ауылы ағинәйҙәре Башҡорт теле йылына арналған һәм Халыҡ-ара туған телдәр көнө айҡанлы “Әсәм теле – сәсән теле” тип аталған бик күркәм сара ойошторҙо. Байрамдың бер тында һәм сағыу үтеүендә, һис шикһеҙ, Һарыш ауылы биләмәһенә ҡараған ауылдарҙың мәҙәниәт хеҙмәткәрҙәренең дә роле ҙур ине.

Ағинәйҙәрҙең барыһы ла Рәми Ғарипов, Зәйнәб Биишева, Мостай Кәрим кеүек күренекле шағирҙарҙың туған телгә арналған шиғырҙарын яттан һөйләне. Ретро йырҙар башҡарҙылар, күңелдәрҙе елкендергән дәртле бейеүҙәр ҙә булды.

Шулай уҡ иң мөһиме йәнле аралашыу булғандыр. Был көндә Аптраҡ, Һыртлан, Первомай, Смаҡ ауылдары һәм ҡала ағинәйҙәре эш тәжрибәләре менән уртаҡлашты, ағымдағы йылға мөһим бурыстар билдәләне. Был хаҡта мәҡәләне гәзитебеҙҙең киләһе һандарында уҡырһығыҙ.