Конгэк
-29 °С
Болотло
75 лет Победы
Бөтә яңылыҡтар
Общие статьи
23 Февраль 2020, 17:54

Салауат. Фәнил Бүләков.

Салауатты күрҙем мин төшөмдә,Бығауҙары уның ауыр ине...

Салауатты күрҙем мин төшөмдә,
Бығауҙары уның ауыр ине.
Ни юрарға белмәй аҙарынам,
Йөрәгемә ҡандар һауыр инде.
Ҡараштары сая батырҙың да
Күҙҙәрендә күрҙем һағышын.
Йән иреген быуған дошмандарға
Зәһәр ине уның ҡарашы.
Ярға бәргән ярһыу тулҡындарға
Өнһөҙ ҡарап торҙо күҙ атып.
Бығауланған күпме батырҙарҙы
Башҡорттары өнһөҙ оҙатты.
Салауаттың эргәһенә баҫҡан
Телһеҙ сәсән ниҙер ымланы.
Оран һалыр ине, күптән телһеҙ,
Ымлауынан күҙен дымланы.
Телһеҙ ҡалыу - йәнде йолҡоп алыу,
Ҡамсыларҙан ауыр был яза.
Һынауҙарҙы еңер рухыбыҙға
Ҡылдырмайыҡ бөгөн йыназа.
Теләктәрҙе Аллаһ ишетер ул,
Тик һынауҙар, ай һай, ныҡ яман.
Халыҡ булып ҡына һаҡланайыҡ,
Үҙгәрә лә тора был заман.
Төштәремә керҙе Салауатым,
Үткәндәрҙә йәнем һаташа.
Тарих Ерҙә бик йыш ҡабатлана,
Ҡулса булып килеп тоташа...
Фәнил БҮЛӘКОВ.