Һыуҙа һаҡ булығыҙ

Көндәр бик үк эҫе тормаһа ла, халыҡ һыу буйына ағыла. Һәр саҡ иҫегеҙҙә тотоғоҙ:

- тик рөхсәт ителгән ерҙәрҙә генә һыу инергә мөмкин;

- таныш булмаған урындарҙа сумырға ярамай – һыу төбөндә батҡан бағаналар, таштар, лапылар һәм башҡа нәмәләр ятыуы ихтимал;

- тын тултырылған йөҙөү сараларында ярҙан алыҫ китмәгеҙ – улар төҙөк булмаҫҡа мөмкин, ә был хатта яҡшы йөҙә белгән кешеләр өсөн дә ҡурҡыныс;

- кәмәләргә йәбешергә, навигация ҡорамалдарына: бакендарға, буйкаларға һәм башҡаларға менергә ярамай;

- үтеп барған кәмәләргә йөҙөп барырға, йөҙөргә яраған зоналарҙы сикләүсе буйкаларҙың аръяғына сығырға ярамай;

- дауыллы көндө йәки ярға көслө тулҡын бәрелгән урындарҙа һыу инергә ярамай;

- әгәр көслө ағымға эләкһәгеҙ, ағымға ҡаршы йөҙөргә маташмағыҙ. Был осраҡта ағым ыңғайына һәм әкренләп ярға ыңғайларға кәрәк;

- әгәр һыу өйөрмәһенә эләкһәгеҙ, күберәк итеп һауа һулап алығыҙ ҙа сумып, ҡапыл ғына унан ситкә боролорға тырышығыҙ;

- ауырып йәки хәлһеҙләнеп торғанда, тән температурағыҙ күтәренке булғанда, киҫкен инфекция сире менән ауырығанда һыу инергә ярамай;

- әгәр мускулдарығыҙҙы көҙән йыйырһа, арҡағыҙға ятығыҙ һәм ярға йөҙөгөҙ, шуның менән бергә тартышҡан мускулдарҙы ыуырға тырышығыҙ. Ярҙамға саҡырырға оялмағыҙ;

- ялған шау-шыу күтәрергә ярамай;

- спиртлы эсемлек эскән килеш һыуға яҡын бара күрмәгеҙ – эҫе йәй йылға-күлдәрҙәге байтаҡ фажиғә тап ошо сәбәпле теркәлә. Һыу инеү – күңел асыу ғына түгел, ә һәр беребеҙҙән яуаплылыҡ та талап итә. Әммә сәләмәтлегебеҙгә уның файҙаһы бихисап: һыу тән тиреһе аша үтеп, нервы системаһына ыңғай йоғонто яһай, ҡан әйләнешен, организмда матдәләр алмашыныу процесын яҡшырта. Рәхәтләнеп һыу инегеҙ, сәләмәтлегегеҙҙе яҡшыртығыҙ, тик хәүефһеҙлек саралары тураһында ғына онота күрмәгеҙ!