Ҡоштар, ҡоштар

Бәлки, һеҙ ҙә иғтибар иткәнһегеҙҙер: йәй буйына сырҡылдашҡан ҡала ҡарлуғастары август урталарында юҡ булды. Бер улар ғына түгел, әҙер ояларҙа бала сығарған сыйырсыҡтар ҙа юғалды. Шул осор сәйер тамашаға шаһит булдыҡ. Яҙҙан Мәләүез йылғаһын төйәк иткән бер пар ыласын ике балаһы менән беҙҙең баш осонда өйрөлөп-өйрөлөп остолар ҙа хушлаштылар.

Йәй буйы беҙҙе ҡыуандырған ҡанатлы дуҫтарыбыҙҙың беҙҙе ташлап китеүе бер аҙ моңһоуландырҙы. Бына шулай себештәре ҡанат нығытҡас, улар урман яғына ыңғайлай, һуңғараҡ тупҡа тупланып, йылы яҡҡа юллана. Бар ҡоштар ҙа ҡыр ҡаҙҙары йә өйрәктәр кеүек көнө-төнө осмай, улар яйлап, туҡтала-туҡтала барып етәләр.

Яратам мин ҡоштарҙы күҙәтергә - мауыҡтырғыс та, матур ҙа, моңһоу ҙа күренеш. Улар беҙҙе лә ҡанатландыра, дәрт өҫтәй. Ҡанатлы дуҫтарыбыҙ тормошо балалар өсөн дә бик ҡыҙыҡлы, шулай уҡ тәрбиәүи маҡсатта ла фәһемле.

Хәлиҙә Шәйәхмәтова.