Һөт ҡыйбатланды

Һәр нәмәнең үҙ ваҡыты, һөт миҙгеле артта ҡалды, яратҡан ризыҡҡа хаҡ та артты. Башстат мәғлүмәте буйынса, республикала октябрҙә 2,5-3,2% ҡуйылыҡтағы пастеризацияланған һөттөң бер литры уртаса 51,75 һумға етте. Йыл башында Башҡортостанда йәшәүселәргә ошондай уҡ һөт 50,06 һумға төшә ине.

Ғәҙәттәгесә, пастеризацияланған һөткә хаҡ буйынса иң ҡиммәт ҡала – баш ҡала. Өфөләр уны уртаса 53,72 һумға һатып ала. Нефтекамала бер литры 49,53 һум тора. Өсөнсөлә - Стәрлетамаҡ, унда 47,91 һумға алырға була. Ә иң арзан һөт – Сибайҙа, бер литры - уртаса 47,03 һум, ти статистиктар.

Баҙар иҡтисадында дөйөм бер кимәл юҡ, шуға күрә етештереүсе, һатыусы талабына ҡарап, аҡсаны төрлөсә һыпыралар. Бер магазинға инһәң - 42 һум, икенсеһендә шул уҡ 47 һум. Ә һеҙ ниндәй хаҡҡа һөт эсәһегеҙ?