Ике төбәктең баш ҡалалары араһында тест рейсы

Заманса “Орлан” рельс автобусы Өфө - Ырымбур маршруты буйынса тест үтте.

Һынау барышында Өфө - Дим – Стәрлетамаҡ – Салауат – Мәләүез – Күмертау – Ырымбур маршруттарында  “Орлан”-дың тиҙлек мөмкинлеге тикшерелде. Ул 409 километрҙы 6 сәғәттән дә аҙ ваҡытта үтте. 2,3 миллиондан ашыу кеше йәшәгән маршрут биләмәһендә ошондай тиҙлек пассажирҙар өсөн бик уңайлы буласаҡ.

Республика биләмәһендә проекттың әһәмиәтле өлөшө ғәмәлгә ашырылған. Пассажирҙар араһында рельс автобусы иң яратҡан, һорау менән файҙаланған транспортҡа әйләнгән.

“Орлан” тимер юлының электр үтмәгән участкаларында йөрөү өсөн тәғәйенләнгән. Автобус салонында пассажирҙар өсөн бөтә уңайлыҡтар ҡаралған. Йошаҡ креслолар, биотуалеттар, махсуслаштырылған күтәрмәләр, мөмкинлеге сиклеләр өсөн айырым урындар. Микроклимат, видеокүҙәтеү, янғын хәүефһеҙлеге системалары ҡоролған. Һәр вагонда мәғлүмәт таблоһы бар.

Фото асыҡ сығанаҡтан.

Гөлназ МАНАПОВА.