28 май - Сик буйы һаҡсылары көнө

Ил сиген баҫҡынсыларҙан, дошмандан һаҡлау – ир-егет иңенә һалынған бурыс. Улар биргән анттарына тоғро ҡалып, ошо яуаплы хеҙмәтте башҡара. Төрлө йылдарҙа сик һағы ғәскәрҙәрендә хеҙмәт иткәндәр 28 май көнөн көтөп ала. Улар, ғәҙәттә, үҙҙәренең байрамын киң һәм ихлас билдәләргә күнеккән. Әммә бөгөн коронавирус инфекцияһына бәйле был байрам быйыл өйҙә, яҡындар янында ғына үтәсәк.

Ил сиге һаҡсылары көнө башҡа йылдарҙағы кеүек күмәк кеше ҡатнашлығында үтмәһә лә, «Дан» ял паркында һәйкәлдәргә сәскә һалыу, төрлө йылдарҙа хәрби бурысын атҡарғанда һәләк булған яҡташтарҙы иҫкә алыу сараһы уҙҙы. Унда район хакимиәте башлығының социаль мәсьәләләр буйынса урынбаҫары Геннадий Шлычков, Мәләүез ҡалаһы, Мәләүез һәм Федоровка райондары хәрби комиссары вазифаһын ваҡытлыса башҡарыусы Олег Тройно һәм башҡалар ҡатнашты.