Тарих биттәре буйлап

12 июнь илебеҙҙә Рәсәй көнө билдәләнә. 1990 йылдың был көнөндә РСФСР халыҡ депутаттары съезы Рәсәй суверенитеты тураһында Декларация ҡабул итә. Теүәл бер йылдан һуң, 1991 йылдың 12 июнендә Рәсәй Президенты итеп Борис Ельцин һайлана. Демократик дәүләт төҙөү нәҡ шул осорҙа башлана.

1994 йылда ил етәксеһе яңы байрам - Дәүләт суверенитетын ҡабул итеү көнө тураһында Указ ҡабул итә. Был көн байтаҡ йылдар буйы Бойондороҡһоҙлоҡ көнө булараҡ билдәләнә. 1998 йылда Ельцин уны Рәсәй көнө итеп тәҡдим итһә лә, ул 2002 йылдан ғына шул исем аҫтында йөрөтөлә башлай.

Был байрам календарҙәге ҡыҙыл дата ғына түгел, ул азатлыҡ, тыныслыҡ, милләт-ара дуҫлыҡ байрамы. Илебеҙҙә йәшәгән халыҡтар татыулығын, йәмғиәттәге берҙәмлекте сағылдыра ул. Күңелендә Ватанына һөйөү, илһөйәрлек хисе йөрөткән һәр кем өсөн мөһим дата. Ниндәй генә милләт вәкиле булһаҡ та, беҙҙе бер ил, уның яҙмышы, үткәне һәм киләсәге бәйләй.