Еңеү парады ҡайҙа үтер

75 йыл дауамында Еңеү парадын үткәреү күркәм йолаға әйләнгән, хатта ҡанға һеңгән тиһәк тә була. Нисә быуын был тулҡындарғыс күренеште күҙәтә һәм йыл һайын көтөп ала. Быйыл көтөлмәгән сир үҙгәрештәр индерҙе. Шулай ҙа 1945 йылда уҙғарылған Еңеү парады көнө 24 июнь быйылға ла билдәләнде. Ил Президенты Владимир Путиндың Ҡарары менән Еңеү тантанаһы Мәскәүҙә 2020 йылдың 24 июнендә үткәрелә. Ләкин бар ерҙә үткәреү мөмкинлеге юҡ. Өфөлә лә парад уҙғарылмай.

Рәсәйҙең 13 ҡалаһында властар Еңеү парадын үткәрмәҫкә ҡарар итте. Сикләүҙәр алыныу менән коронавирус инфекцияһы яңы ҡорбандар аулай башланы. Ҡайһы бер төбәктәр парад ойоштороуҙы билдәһеҙ ваҡытҡа кисектереп тора. Орёл ҡалаһында, мәҫәлән, парадты 5 августа үткәрергә әҙерләнәләр. 1943 йылдың тап ошо көнөндә Курск Дуғаһындағы яуҙарҙан һуң Орёл менән Белгородты азат итеү хөрмәтенә Бөйөк Ватан һуғышында беренсе салют бирелгән.