Ураҙаның йәшерен шарттары

1) Һүҙ – ураҙанан һуң харам аҙыҡ менән ауыҙ асыусы тураһында.

2) Һүҙ – үҙе ураҙала булып та, кешеләр хаҡында ғәйбәт һөйләүсе һәм, шулай итеп, ул кешеләрҙең ите менән "ауыҙ асыусы" тураһында (сөнки кемдер тураһында ғәйбәт һөйләү гонаһ яғынан уның итен ашау менән бер).

"Берәүҙәрегеҙ икенселәрегеҙ тураһында ғәйбәт һөйләмәһен. Берәйегеҙ үҙенең үлгән ҡәрҙәшенең итен ашарға теләр инеме?" – тигән Аллаһ Тәғәлә Ҡөрьәндә (49:12).

3) Һүҙ – тән ағзаларын ярамағандан тыймаған кеше тураһында.

 Ауыҙ асыу ваҡыты еткәндә самаһыҙ күп ашаныу ҙа һәйбәт түгел. Хатта тамаҡ хәләл аҙыҡтан ғына торған хәлдә лә. Сөнки, бәғзе хәҙистәрҙән белеүебеҙсә, Аллаһ Тәғәләне ныҡып тултырылған ашҡаҙандан да нығыраҡ нәфрәтләндереүсе бүтән һауыт юҡ.

Ҡайһы берәүҙәр, махсус, Рамаҙан өсөн тип, башҡа айҙарҙа бер ашамағанын һатып ала йә бешерә башлай: бер көн был нәмә, икенсе көн икенсе яңы нәмә... Иртәгә ниндәй яңы нәмәләр бешерергә икән, тип бөтә көндәрен шуны әҙерләүгә бағышланғандар ҙа бар. Был ай – ҡорһаҡ байрамы йә тамаҡ ашап рәхәтләнә торған ай түгел, туғандар.

Ураҙаның маҡсаты – нәфсене ауыҙлыҡлап, ғәҙәттәге ашаған нәмәләрҙе лә ашамай йөрөп, рухыбыҙҙы нығытыу, уны таҙартыу, изге эштәр өсөн тәрбиәләү.

 Ураҙа бөтөп, ауыҙ асҡандан һуң, кешенең йөрәге өмөт менән ҡурҡыу араһында булырға тейеш. Сөнки кеше белмәй: ураҙаһы ҡабул булып, Аллаһтың яратҡан ҡолдарынан яҙылдымы икән ул, әллә, киреһенсә, ураҙаһы кире ҡағылып, Аллаһ нәфрәтләнгәндәр араһына эләктеме?

Был шулай уҡ бүтән изге эштәргә лә ҡағыла. Ураҙа тотам, намаҙ уҡыйым, саҙаҡа бирҙем, тағы ниндәйҙер яҡшы эш эшләнем, тип маһайып, башҡаларға өҫтән ҡарап йөрөргә ярамай. Быларҙың барыһы ла – тик Аллаһ Тәғәләнең ярҙамы менән генә.

"ӘлхәмдүлиЛләһ, мосолманмын", тип, "әлхәмдүлиЛләһ, Аллаһ миңә изге эштәр ҡылырға форсат бирә", тип шөкөр итергә кәрәк. Һәм, әлбиттә: "Ҡылған ғибәҙәтемде, эшләгән яҡшы эштәремде Аллаһ Тәғәлә ҡабул итһен ине", – тип доғала булайыҡ.