Алтынға бәрәбәр ваҡытты урламағыҙ

Донъя бит - әле генә һау-сәләмәт йөрөгән кешеләр ҡапыл ауырып китә. Был осраҡта, әлбиттә, йортҡа врач саҡырырға ҡала. “Ашығыс ярҙам” саҡырғанда ауырыуҙың тулыһынса исем шәрифен, адресын, ишектең код һандарын әйтеү мөһим. Уларҙы подъезд алдында, ә шәхси йортта йәшәһәгеҙ, ҡапҡа алдында ҡаршылағыҙ. Ауырыуҙың документтарынан паспортын, медицина картаһын әҙерләгеҙ.

Ваҡиғалар хроникаһынан күренеүенсә, аҙна һайынбик күп ялған саҡырыу теркәлә. Ә был административ хоҡуҡ боҙоу булып иҫәпләнә һәм штраф ҡаралған.

Мәҫәлән, янғын һағы, полиция, “Ашығыс ярҙам” һәм башҡа махсуслаштырылған хеҙмәттәрҙе сәбәпһеҙ саҡырған граждандарға РФ Административ хоҡуҡ боҙоуҙар тураһындағы кодекстың 19.13-сө статьяһына ярашлы, 1 мең һумдан алып 1 мең 500 һумға тиклем штраф ҡаралған. Аноним шылтыратҡанда телефон номеры, уның ниндәй адрестан икәнлеге диспетчер хеҙмәтенең комьютерында асыҡ күренә. Шулай булғас, ялған шылтыратыусыларға яуаплылыҡтан ҡотолоу мөмкин түгел.