Милли ризыҡ - тәнгә лә, йәнгә лә шифа

Һуңғы йылдарҙа республикала халҡыбыҙҙың милли үҙенсәлектәрен һаҡлауға, үҫтереүгә, таратыуға етди иғтибар бирелеүе ҡыуаныслы. Үткән аҙна аҙағында белем биреү учреждениелары араһында ике көн дауамында “Минең милли аҙығым” флешмобы үтеүе лә шуға асыҡ дәлил. Сара сиктәрендә оҫталыҡ дәрестәре, кластан тыш саралар, күргәҙмәләр, презентациялар ойошторолдо. Унда уҡыусылар, ата-әсәләр, педагогтар, ашнаҡсылар әүҙем ҡатнашты.Йәш быуында бешеренеүгә ҡыҙыҡһыныу уятыу, дөрөҫ туҡланыу ҡағиҙәләрен үтәүгә ылыҡтырыу, үҙ халҡының кулирания традицияларын өйрәтеү маҡсатында уҙғарылған акция Кинйә Арыҫланов исемендәге 9-сы башҡорт гимназияһында айырыуса йәнлелек менән үтте. Уның сиктәрендә технология уҡытыусыһы Асия Рахманғолова 8-се класс ҡыҙҙарына ҡыҫтыбый бешереү тәжрибәһе менән уртаҡлашты. Был милли ризыҡтың төрө, әҙерләү процесы, файҙаһы тураһында һөйләне, аҙаҡ бешереп күрһәтте. Ҡыҙҙар ҙа үҙенең оҫталығын ҙур теләк менән һынап ҡараны. Кемеһелер ҡамыр йәйҙе, икенсеһе бешерҙе, өсөнсөһө майлап, эслеген һалды, биҙәп өҫтәлгә ҡуйҙы.Бер үк ваҡытта ашханала ашнаҡсылар тырышлығы менән милли ризыҡтар күргәҙмәһе эшләне. Өҫтәл ризыҡ төрлөлөгөнән һығылып тора ине: бауырһаҡ, сәк-сәк, бәләкәй-ҙур бәлештәр, гөбәҙиә, бишбармаҡ, тултырылған тауыҡ, ҡаҙ һәм башҡа һөт, ит аҙыҡтары, буҙа, ҡымыҙ, бал, ҡаҡ. Гимназистар, әлбиттә, башҡорт халҡының традицион аҙыҡтары хаҡында яҡшы белә, шулай булыуға ҡарамаҫтан, күргәҙмәне ҙур ҡыҙыҡһыныу менән ҡараны.