“Аманат” тамашасыһын йыйҙы

Тәүгеләрҙән булып Гөлсинә Ҡаразбаева етәкселегендәге “Аманат” фольклор вокаль-инструменталь ансамбле сығыш яһаны. Баян, гармун, ҡумыҙ, һыбыҙғы, мандолинала уйнаған, халыҡ йырҙарын, мөнәжәттәр башҡарған һәм бейеүселәре булған фольклор коллективының үҙ тамашасыһы бар. Һигеҙ йыл элек барлыҡҡа килгән ансамблдең репертуары йылдан-йыл байый. Халыҡ йырҙарынан тыш, унда үҙешмәкәр композитор, шағир Фәнил Яманаевтың йырҙары ла ҙур ғына урын алып тора. Бибича Хафизова, Зөлфиә Ибраҡова, Салауат Сәйфуллиндар, шулай уҡ республика конкурстары лауреаттары Райхана Хафизова, Ләйсән Вәлиевалар башҡарыуындағы йырҙар “Саптар” бейеү ансамбле сығышы менән үрелеп барҙы һәм сағыу тамашаға әйләнде. Коллектив башҡорт йырын таратыу, пропагандалау менән бергә халҡыбыҙ йолаларына һәм ғөрөф-ғәҙәттәренә лә ҡыҙыҡһыныу тәрбиәләүҙе маҡсат итеп ҡуйған. Концертта “Йома сәйе” йолауи байрамын күрһәтеүҙәре лә шуны иҫбатланы.