+12 °С
Ямғыр
Бөтә яңылыҡтар
Мәҙәниәт һәм әҙәбиәт
30 Октябрь 2019, 16:11
Һеҙ яратҡан шиғырҙар
Йәшлектең дә, әгәр ҡабатланһа, Булмаҫ ине, бәлки, ҡыҙығы...
Ҡапҡа төбөндә . . .
Ауыл өҫтөн тынлыҡ ҡаплағас,
Ҡарт - ҡоролар ятып йоҡлағас,
Йөрөүселәр бөткәс күҙ атып,
Егет килде ҡыҙын оҙатып.
Туҡтанылар ҡапҡа төбөндә,
Ҡыҙ ашыҡҡан булды өйөнә;
Егет уны ҡыҫтап туҡтатты,
Йылы һүҙҙәр әйтеп йыуатты.
Тотоп алды уның биленән...
Ҡайнар һүҙҙәр, ҡайнар ирендәр...
"Абау, мөхәббәтһеҙ, кит бынан!"-
Тигән булды ҡыҙый, тик һаман
Егетенә нығыраҡ һыйынды.
Ай нурына донъя ҡойондо.
һүҙҙәр бөтмәй йөрәк түрендә,
Улар һаман ҡапҡа төбөндә.
Ҡыҙы тағы китте үҙгәреп -
Хәтерләне әсә һүҙҙәрен.
Инәм, тиеп тағы уҡталды,
"Аҙға ғына" тағы туҡталды;
Улар һүҙҙе тағы яңыртты,
Ул арала инде таң атты.
Ҡабатлана шулай көн һайын
Йәшлек тигән нәмә, моғайын,
Йоҡоһоҙ һәм айлы төн менән
Башланалыр ҡапҡа төбөнән.
****
Уның менән ҡултыҡлашып уҙҙың,
Һин уныҡы хәҙер, уныҡы...
Мин йылғаның хәҙер был ярында
Ә һин хәҙер теге ярҙыҡы.
Араларҙа тәрәнлектәр ята,
Һәм тулҡындар ята тау һымаҡ,
Таң алдынан күк томандар ята,
Күк томандар ята ау һымаҡ.
Тәрәнлектәр һәм тулҡындар аша
Йөҙөп сығыр инем - хаҡым юҡ,
Таң алдынан күк томандар аша
Һине ҡосор инем - хаҡым юҡ.
Осрағанда туҡтап һөйләшергә,
Танырға ла хатта хаҡым юҡ;
Араларҙа беҙҙең бер ҡасан да
Булмағандыр кеүек яҡынлыҡ.
Мин йылғаның хәҙер был ярында,
Ә һин уның теге ярында;
Ике яр бит тоташмаған кеүек
Уртаһында йылға барында.
****
Ғүмер китабымды, альбом кеүек,
Ҡарап сығырға ,тип бирһәләр,
"Йәшлек" тип яҙылған өс-дүрт битен
Урлар инем,
Әгәр күрһәләр,
Ҡасыр инем алыҫ ерҙәргә,
Йәшлегемде һалып эйәргә.
Ул ҡайҙалыр бик яҡында ҡалған:
Ауылымдың айлы төнөндә
Фуражкаһын ҡырын һалған егет
Ҡыҙын көтә тирәк төбөндә.
Эшкә һуңлай, тиеп, борсолмағыҙ,
Йәшлек бит ул!
Йәшлек өлгөрөр!-
Таң атҡансы тирәк төбөн һаҡлар,
Ә таң менән эшкә йүгерер...
Шундай сағым бик яҡында кеүек,
Ҡулды һуҙһам, етер шикелле,
Ҡулды һуҙам тиеп бер үрелһәм,
Өркөтөрмөн, китер шикелле.
Мин яратам ҡояш сыҡҡан сағын,
Ерҙең өҫтөн нурға балҡытып;
Табалманым,дуҫтар, ғүмеремдең
Йәшлектән дә матур ваҡытын!
Тик донъяла бер ни ҡабатланмай,
Һәр нәмәнең була һыҙығы;
Йәшлектең дә, әгәр ҡабатланһа,
Булмаҫ ине, бәлки, ҡыҙығы.
Ул ҡайҙалыр бик-бик яҡында,
Йыр йырлайҙар уның хаҡында.
Әнғәм Атнабаев
Читайте нас:
Редакция һайлауы
© 2024