Өфөлә китап байрамы үтә

Өс көн буйы йәрминкә сиктәрендә китап һатыу, оҫталыҡ дәрестәре, авторҙар менән осрашыуҙар, шиғыр һөйләүселәр конкурсы буласаҡ, иң яҡшы әҫәрҙәр буйынса моноспектаклдәр күрһәтеләсәк, тип билдәләй республиканың мәҙәниәт министры урынбаҫары Наталья Лапшина.

- Был көндә йәрминкә менән бергә Денис Мацуевтың да фестивале уҙасаҡ һәм ул үҙе хаҡында яҙған китабын презентациялаясаҡ, - ти Наталья Михайловна. – Нәшриәттәр араһында иң яҡшы йыл китабы конкурсы ла күҙаллана. Әле  йәрминкәлә илебеҙҙең һәм сит илдәр нәшерләүселәрен күберәк йәлеп итеү өҫтөндә эшләйбеҙ. “Мәҙәниәт” милли проекты сиктәрендә асылған моделле китапханаларҙы ла күрһәтергә ниәтләйбеҙ.

Был сараның маҡсаты – уҡыуҙы популярлаштырыу, яңы китаптар хаҡында белдереү, йәш быуында илһөйәрлек тәрбиәләү. Йәрминкә Башҡортостан Башлығы Радий Хәбиров ҡушыуы буйынса уҙғарыла.  Ойоштороусылары – БР Мәҙәниәт министрлығы, БР Сауҙа министрлығы һәм Башҡортостан Яҙыусылар союзы.