ҺИНЕ ТАҒЫ БЕР КҮРЕРГӘ ИНЕ...

Һине тағы бер күрергә ине…
Таныр инем микән үҙеңде?
Хәтеремә уйылып ҡалһын өсөн
Алмаҫ инем һинән күҙемде…

Мин һыйпаған сәстәр салдыр инде…
Күҙҙәреңдә – тыйнаҡ йылмайыу…
Күңелемә ләззәт бирер микән
Уртаҡ һауа менән тын алыу?

Һин – минеке түгел.
Ә шулай ҙа
Тик бер генә килә күрәһем,
Күҙҙәреңә бер тултырып ҡарап
Маңлайыңдан берҙе үбәһем.

Һине тағы бер күрергә ине…
Башҡа күрмәҫ өсөн китергә,
Минең йәшлегемдә ҡасандыр бер
Булғаныңа рәхмәт әйтергә…

Фирүзә АБДУЛЛИНА.