Һөнәр һайлап, уға ғүмере буйы тоғро ҡалған, яратҡан эшенә үҙен тулыһынса бағышлаған кешеләр бар арабыҙҙа. Ундайҙар миндә, ысын мәғәнәһендә, һоҡланыу уята, сөнки улар үҙ тәғәйенләнешен, юлын, асылын тапҡан.
Ҡалабыҙҙың 3-сө гимназияһында башланғыс класс уҡыусыларына төплө белем, тәрбиә биргән хөрмәтле уҡытыусы Миләүшә Нәжип ҡыҙы Зөбәйерова менән яҡындан танышыу бәхетенә ирешкәс, йәмғиәтебеҙҙә көслө рухлы, донъяға етди ҡарашлы, иҫ китмәле сифаттарға эйә кешеләребеҙ барлығына тағы бер ҡат инандым. Мөләйем йөҙлө, итәғәтле Миләүшә Нәжип ҡыҙы матурлыҡ һәм аҡыл, камиллыҡ һәм күркәм холоҡ төшөнсәләрен берләштергән илаһи зат. Уның менән аралашыуы еңел, фәһемле әңгәмәлә Миләүшә Зөбәйерованың күңел байлығына, тәжрибәһенә, эске донъяһының матурлығына иғтибар итмәү мөмкин түгел.
Миләүшә ханым баш ҡалабыҙ Өфөлә тыуһа ла, бәләкәй саҡтан яҙмышы Мәләүез ере менән бәйләнә. Студент йылдарында уҡ өйләнешкән ата-әсәһенең ғаилә усағы тиҙ арала һүрелеүе ҡыҙғаныс. Үҫмер сағынан йәтимлек әсеһен татыған әсә кеше Фирүзә Фәйзрахман ҡыҙы Мортазина Миләүшәһен бәхетле итер өсөн бар көсөн һала, тырышып юғары белем ала, һәр эштә маҡтаулы хеҙмәткәр исемен йөрөтә. Тағы ла ҡатын-ҡыҙ бәхетен һынап ҡарай ул, әммә бер уңмаған юл тағы ла ҡабатлана. Бәхеткә күрә, Миләүшәгә иш табыла, Рәшит ҡустыһы барлығына һөйөнөп, туғанлыҡтың ҡәҙерен белеп йәшәй ханым.
Миләүшә Зөбәйерова кесе йәштән уҡыуға маһир, зирәк, отҡор була. Васильевка һигеҙ йыллыҡ мәктәбендә башланғыс класта уҡытҡан беренсе уҡытыусыһы Раиса Николаевна Понявина ошо һөнәргә ҡарата һөйөү, ихтирам орлоҡтарын һала ла инде. Үҙенең өлгөһөндә кешелекле, кеселекле, тәүфиҡлы, камил булырға өйрәтә. Яратҡан уҡытыусыһы менән бәйләнеште оҙаҡ йылдар өҙмәйенсә һаҡлай Миләүшә Нәжип ҡыҙы. Әле лә сикһеҙ рәхмәте менән иҫкә ала уны, күңеленә һеңеп ҡалған кәңәштәрен иҫендә тота.
Балаларҙы яратҡан, уҡытыусылыҡ һөнәренә ғашиҡ Миләүшә башта Салауат педагогия училищеһын, аҙаҡ Стәрлетамаҡ дәүләт педагогия институтын тамамлай. Хеҙмәт юлын ҡаланың 7-се мәктәбендә башлаһа, инде 28 йыл дауамында 3-сө гимназияла башланғыс кластарҙы уҡыта. Миләүшә Зөбәйерова уҡыусыларына белем биреп кенә ҡалмай, уларҙы тормошҡа яраҡлы кеше итеп тәрбиәләй, миһырбанлылыҡ, әҙәплелек сифаттарын күндерә. Ныҡышмалы һәм эҙмә-эҙлекле эшләгән уҡытыусы яңы методика, технология ҡулланып ҡына дәрес биреү менән сикләнмәй, ә һәр бала менән уртаҡ тел таба, кескәйҙәрҙең үҙенсәлектәрен иғтибарға ала. Талапсан, шул уҡ ваҡытта нескә һәм йомшаҡ күңелле уҡытыусыһына балалар ҙур ышаныс менән баға, уны алға әйҙәүсе, яҡлаусы, өйрәтеүсе тип ҡабул итә. Миләүшә Нәжип ҡыҙының уҡыусылары ла төрлө конкурс, олимпиадаларҙа призлы урындар яулай, сараларҙа әүҙем ҡатнаша. Ата-әсәләр араһында ла ҙур хөрмәткә, ихтирамға лайыҡ уҡытыусы.
- Эшеңде күңел биреп башҡарғанда ғына уңышҡа, юғары һөҙөмтәгә өлгәшергә мөмкиндер ул. Һөнәремдән тыш мин балаларҙы ныҡ яратам. Эскерһеҙ, асыҡ, ихлас кескәйҙәр - бөтөнләй икенсе донъя, - ти педагог.
Миләүшә Зөбәйерова мәғариф өлкәһендәге эшмәкәрлеге, ҡаҙаныштары өсөн гимназия, район-ҡала хакимиәттәре Маҡтау грамоталары менән бүләкләнгән, ул – “Башҡортостан Республикаһы мәғариф отличнигы”. Уның өсөн иң ҙур баһа – уҡыусыларының, ата-әсәләрҙең оло рәхмәте.
Миләүшә Нәжип ҡыҙы үҙен бәхетле һанай. Ул тормош иптәше Данир Йәүҙәт улы Зөбәйеров менән Маргарита һәм Динис исемле балаларға ғүмер биреп, оло тормош юлына баҫтырған. Ҡыҙҙары үҙе әсәй инде. Ғаиләнең ҡыуанысын арттырып кескәй Карина үҫеп килә.
Миләүшә ханым тормоштан йәм табып, һәр көнгә ҡыуанып, киләсәккә яҡты өмөттәр бағлап йәшәй. Яҙҙың күркәм көнөндә ул үҙенең тыуған көнөн билдәләне. Тәбиғәттең йәшәреп, сәскәгә күмелеп ултырған осоронда тыуған кешеләр үҙҙәре лә һөйкөмлө була. Уларҙан йылылыҡ, илаһилыҡ бөркөлә. Миләүшә Нәзиб ҡыҙы кешелекле, ярҙамсыл, изгелекле кеше.
Тыуған көнө уңайынан уға ныҡлы сәләмәтлек, рух ныҡлығы, йән тыныслығы, уңышлы, шатлыҡлы оҙон ғүмер теләге килә.