Бәхет сере - ябайлыҡта

Ғаилә - осо-ҡырыйы күренмәгән диңгеҙҙә йөҙгән карап. Төпһөҙ киңлекте иңләгән кәмәнең имен сәйәхәтен тәьмин итерҙәй капитаны булырға тейеш, - ти аҡыл эйәләре.

Бөгөнгө геройҙарым - Смаҡ ауылында йәшәгән Миңзилә һәм Зөфәр Мәҡсүтовтар. Был тарафта өлгөлө, яуаплы, тормошта үҙ урынын тапҡан, балаларына лайыҡлы тәрбиә биргән, бер-береһенә тоғро һоҡланғыс парҙар күп. Ундайҙар ҡайҙа ғына булһалар ҙа һынатмай, ҡаршылыҡтарға баш эймәй, бирешмәй.

Уларҙың ғаилә бәхете сере - ябайлыҡ һәм асыҡлыҡта. Зөфәр ағай күрше Исламғол ауылында тыуып үҫкән. Ғаиләлә 5 малай араһында тәрбиәләнгән бала үҙенән бәләкәй ҡустыларына бөтә йәһәттән өлгө, ата-әсәһенә ярҙамсы була. Бала саҡ тиҫтерҙәре менән шул быуынға хас спорт уйындарына әүәҫлеге, йәйгеһен көмөш һыулы йылғаны арҡыры-буй иңләп, кинәнеп йөҙөүҙәре, ҡышҡыһын хоккей уйындары, саңғыла йөрөүе Совет Армияһы сафында һыу аҫты кәмәһендә хеҙмәт иткәндә ярҙам итә. 3 йыл Тымыҡ океан киңлектәрен гиҙә матрос.