Урман янғындарын булдырмау өсөн

Республиканың урман фонды биләмәләрендә янғынды һүндереү буйынса ҡабул ителгән план 2018 йылда янғын хәүефһеҙлеге миҙгеленә әҙерлек эштәрендә төп этаптарҙың береһе тип һанала.

Күнекмәләр Иглин, Яңауыл, Балаҡатай һәм Белорет райондарында уҙҙы.

24 апрелдә иртәнге 10-да Ишембай районында Маҡар урмансылығы биләмәһендә Бәләбәй, Йылайыр, Ғафури, Ейәнсура, Күгәрсен, Кананикольск, Стәрлетамаҡ, Туймазы урман хужалыҡтары, “Ишембай” янғын-химия станцияһы, “Башҡортостан” милли паркы, республиканың Ғәҙәтән тыш хәлдәр министрлығының янғын частары һәм башҡа көстәр ҡатнашлығында республика төбәк күнекмәһе үтә.

Бындай сара урман янғындарын иҫкәртеү, уларҙың таралыуын сикләү, хәүефте кәметеү, шулай уҡ уның сығанаҡтарын ваҡытында табыу һәм һүндереүгә йүнәлтелә.

Урман янғындары сығанағын асыҡлау һәм һүндереү, ут сығыу тураһында хәбәр итеү, уны һүндереүҙә ҡатнашыусыларҙы мобилизациялау, халыҡты эвакуациялау, диспетчер хеҙмәтенең оператив эшмәкәрлеге мәсьәләләре лә тикшереләсәк.