Ташҡындан нимә көтөргә?

Апрелдә йылы һәм һалҡын көндәр алмашынып килде, яҙғы һыу ергә һеңә барҙы. Һуңғы көндәр ямғырлы булыуға бәйле Ағиҙел һәм Мәләүез йылғаларында һыу кимәле күтәрелеүе күҙәтелә, бөгөн ярҙарынан сыҡмаһа ла, һаҡлыҡ саралары ҡамасауламаҫ.

Юрматауҙа баш алып, Көньяҡ Урал тауҙары аша аҡҡан республиканың иң йылғыр йылғаһы Нөгөшкә ҡар һыуҙары күпләп аға. Үҙ сиратында һыуһаҡлағыста һыу кимәле көнөнә норманан 80 сантиметрға артыуын билдәләйҙәр. Быуанан аҫтараҡ йылға, урыны менән ярҙарынан сығып, киңлеккә ынтыла. Юлындағы Түбәнге Таш менән Андреевка ауылдары араһындағы күперҙе лә баҫып китә. Көтөлмәгән ташҡында күперҙең икенсе осондағылар киҫелеп ҡала, шөкөр, барыһы ла иҫән-һау.

Шуға күрә яҙ хәүефһеҙлек сараларын инҡар итергә ярамай, һәр саҡ уяу булырға кәрәк.