Иғтибар - балалар!

Башҡортостанда ете айҙа балалар ҡатнашлығында 200-ҙән ашыу юл фажиғәһе теркәлгән. 8 бала ғүмере өҙөлгән, 216-һы йәрәхәтләнгән.

Балалар оҙайлы ялдан һуң мәктәпкә йыйына, бөтә ерҙә йәнләнеү һиҙелә. Уҡыусылар ошо осорҙа яңы көндәлек режимын үҙгәртә, әлбиттә, өйрәнеү өсөн ваҡыт талап ителә. Шуға күрә “Иғтибар – балалар!” акцияһы башланыуы бик урынлы. Водителдәргә ҙур яуаплылыҡ һалына, уларға һәр ваҡыт иғтибарлы булырға кәрәк, ә хәҙер айырыуса етди ҡараш мотлаҡ. Акция барышында юл хәрәкәте хәүефһеҙлеге дәүләт инспекцияһы ҡатнашлығында махсус комиссия мәктәп яны юлдары, юл билдәләре торошон тикшерә. Атай-әсәйҙәр кескәйҙәрҙе юл аша сыҡҡанда ҡулдан ысҡындырмаҫҡа, кейемдәрен, порфелдәрҙе яҡтыртҡыстар менән тәьмин итергә тейеш. Иң мөһиме, балаларға юлда хәүефһеҙлек ҡағиҙәләрен өйрәтеү һәм үҙ миҫалдарында дәлилләү мотлаҡ.