Һауа торошо сюрприздары алда әле

Элек ҡышҡы һауа торошо йәй көнө үк теүәл фаразланһа, хәҙер көтөлмәгән үҙгәрештәргә күнегеп тә барабыҙ, буғай. Ҡаты һыуыҡтарҙан һуң ҡапыл йылытыу йә, киреһенсә, термометр бағанаһы күрһәткесенең ҡырҡа төшөп китеүе кеше организмына, бигерәк тә хроник сирлеләргә кире йоғонто яһай. Шишәмбе ямғыр ҡатыш ҡары менән шаҡ ҡатырҙы. Ә иртәнгә төнө буйы яуған ҡар тирә-яҡты әкиәт донъяһына әйләндереп ҡыуандырһа, иртән көрт йырып эшкә ашығыусыларға мәшәҡәт тә өҫтәне. Гисметео мәғлүмәте буйынса, кесе йоманан шәмбегә тиклем көндөҙ температура плюс билдәһен күрһәтһә, йәкшәмбегә ҡарай төндә ҡапыл 14-16 градусҡа тиклем түбәнәйә. Февралдең икенсе аҙнаһында һыуыҡ булыуы көтөлә, төндә 30 градусҡаса һалҡын булыуы мөмкин.