Гражданлыҡ бурысына яуаплы ҡаранылар

3-сө гимназиялағы ике участка асылыу менән йәнлелек башланды. Ғәҙәттә, иртәнге мәлдә оло быуын әүҙемлек күрһәтһә, быйыл йәштәрҙең дә булыуы - бик ҡыуаныслы хәл. Иртәнге 8-ҙә 3473-сө участкала исемлектәге 986 һайлаусының 48-е тауыш биргәйне инде, көндөҙгө 11-ҙә әүҙемлек - 38% ине.

2564-се участкала ла халыҡ ағымы өҙөлмәй. Унда иртәнге 8-ҙә 1133 һайлаусының 41-е гражданлыҡ бурысын үтәгән ине. Тәүгә һайлаусыларҙың 3-һө бик яуаплы ҡараны, беренселәрҙән булып үтә күренмәле урналарға бюллетендәрҙе төшөрҙө.

Килеүселәр араһында тыныслыҡ, юғары кәйеф хөкөм һөрөүен дә билдәләргә кәрәктер, үҙ-ара аралашҡанда ла иртәгәһе көнгә ышаныс менән ҡарау һиҙелә.