Юлдар төҙөкләндерелә

Рәсәйҙең икеһе бәләһе бар, тиҙәр. Шуларҙың береһе - юлдар. Уларҙың торошо водителдәрҙе лә, йәйәүлеләрҙе лә бер тигеҙ борсой.

Республика халҡы өсөн дә юл торошо, ундағы соҡор-саҡырҙар, шул сәбәпле емерелгән машиналар көнүҙәк мәсьәлә булып ҡала.

Быйылғы план буйынса төҙөкләндереү эштәре 15 апрелдә башланып, 15 июнгә тамамланырға тейеш. Юлдарҙағы һәм ихаталарҙағы соҡорҙарҙы һанлаштырыу эше өсөн яуаплылыҡ Транспорт һәм юл хужалығы буйынса дәүләт комитетына йөкмәтелгән. Урындарҙа уны муниципалитет етәкселәре ойоштора. Соҡорҙарҙың ҡайһы урында, ниндәй күләмдә булыуы тикшерелеп, теркәлгәндән һуң, документ әҙерләнә. Барлыҡ саралар үткәс, төҙөкләндереү эштәре башлана. Соҡорҙарҙың үлсәмен, уларҙың ҡайһы урындарҙа урынлашыуын күрһәткән мәғлүмәт буйынса берҙәм электрон база булдырыла. Был ысул сығымдарҙы дөрөҫ бүлеү өсөн уңайлы.

Беҙҙең районда ла юлдарҙың емерелгән ерҙәрен, соҡорҙарын ямау буйынса эштәр башланды. Салауат ҡалаһына илткән, шулай уҡ Мәләүез-Рассвет һәм ҡала ситендәге юлдың көнбайыш өлөшө ремонтланған. Бөгөн уның көньяҡ өлөшөндә эш дауам итә. Тәү сиратта, хәрәкәт күп булған юл селтәре төҙөкләндереләсәк. Район буйынса ремонт эштәрен «Башкиравтодор» ойошмаһының Мәләүез филиалы башҡара. Ҡала урамдарын төҙөкләндереү менән бер нисә юл - төҙөлөш ойошмаһы шөғөлләнәсәк.

Әлегә юлдың емерек урындарын, соҡорҙарҙы ямау эше алып барылһа, һуңыраҡ унда асфальт түшәлә.

Барлыҡ төҙөкләндереү эштәре «Хәүефһеҙ һәм сифатлы автомобиль юлдары» милли проекты сиктәрендә тормошҡа ашырыла. Ремонт өсөн райондарға бишәр миллион һум аҡса бүленә.