Бөтә яңылыҡтар
Социаль мәсьәлә
29 Ноябрь 2016, 17:03

Яҡшы әсәй булайыҡ!

Әсәйҙәр көнө сиктәрендә район-ҡаланың белем биреү учреждениеларында саралар дауам итә. “Көлһылыу” 21-се балалар баҡсаһында “Ниндәй әсәйһең, һин...” темаһына район-ҡаланың хеҙмәт һәм халыҡты социаль яҡлау, мәғариф идаралыҡтары, балиғ булмағандар эше һәм уларҙың хоҡуғын яҡлау буйынса комиссия, опека һәм попечителдәр, эске эштәр бүлектәре белгестәре ҡатнашлығында “түңәрәк өҫтәл” ултырышы үтте.

Әсәйҙәр көнө сиктәрендә район-ҡаланың белем биреү учреждениеларында саралар дауам итә. “Көлһылыу” 21-се балалар баҡсаһында “Ниндәй әсәйһең, һин...” темаһына район-ҡаланың хеҙмәт һәм халыҡты социаль яҡлау, мәғариф идаралыҡтары, балиғ булмағандар эше һәм уларҙың хоҡуғын яҡлау буйынса комиссия, опека һәм попечителдәр, эске эштәр бүлектәре белгестәре ҡатнашлығында “түңәрәк өҫтәл” ултырышы үтте.



Ултырышты мәктәпкәсә белем биреү учреждениеһы педагогтары алып барҙы. “Түңәрәк өҫтәл”дә ҡатнашҡандар иң беренсе балалар баҡсаһы тәрбиәләнеүселәре башҡарыуыуында әсәйҙәр тураһында шиғыр, йыр тыңланы. Әсәй тигән юғары исеме йөрөткән кеше ниндәй булырға тейешлеге тураһында социаль реклама ҡараны. Район-ҡаланың ҡатын-ҡыҙҙар ойошмаһы рәйесе Жанна Ғәйетҡолова гүзәл заттарҙың йәмғиәттә тотҡан урыны, бала тәрбиәләүҙә әсәйҙәр роле , әсәлекте, балалыҡты һаҡлауға йүнәлтелгән саралар тураһында сығыш яһаны. Ҡатын-ҡыҙ иңенә,тәү сиратта, әсәй булыу бурысы йөкмәтелгән. Уны уңышлы атҡарып сығыу өсөн иң яҡшы сифаттарға эйә булырға кәрәклеген һыҙыҡ өҫтөнә алды. Лайыҡлы алмаш, Тыуған илдең файҙалы ул һәм ҡыҙҙары итеп үҫтереү өсөн, иң беренсе, үҙ өлгөбөҙҙә балаларҙа эшкә, кешеләргә, тирә-яҡ мөхиткә, Ватанға һөйөү тәрбиәләү мөһимлеген билдәләне.


Балиғ булмағандар эше һәм уларҙың хоҡуғын яҡлау буйынса сектор рәйесе урынбаҫары Эльвира Фәйзуллина имен булмаған ғаиләләрҙә үҫкән балаларҙың яҙмышы, йәш быуынға рухи-әхлаҡи тәрбиә биреүҙә әсәйҙәр өлөшө, ҡатын-ҡыҙ, балалар алкоголизмы, ғаиләлә көс ҡулланыу мәсьәләләрен күтәрҙе.


Опека һәм попечителдәр бүлеге начальнигы Айгөл Айҙарбәкова социаль йәтимлекте иҫкәртеү буйынса бүлек алып барған эшмәкәрлек менән таныштырҙы. Ҡартайғас балаларыңдың ҡәҙер-хөрмәтен күрергә теләһәң, улар бәләкәй сағында һөйөүеңде йәлләмә - был сығыш яһаусының төп фекере булды.


Ҡатын-ҡыҙҙың ғаиләлә, йәмғиәттә роле баһалап бөткөһөҙ. Күп әсәйҙәр бала тәрбиәләү менән бер үк ваҡытта һөнәри эшмәкәрлеген дә уңышлы алып бара. Балалар баҡсаһы педагог-психологы Галина Белецкая арығанлыҡтан, көсөргәнештән һаҡланыу гимнастикаһын тәҡдим итте.


Өлгөлө әсәй, алдынғы ҡарашлы педагог Галина Ширяева бала тәрбиәләү тәжрибәһе менән уртаҡлашты. Бала өсөн әсәй иң яҡын, кәрәкле кеше булыуын фәһемле хикәйәт һәм үҙенең тормошонан миҫал менән раҫланы.


Сара һуңында Жанна Николаевна аҙ килемле, күп балалы, ауыр тормош хәлендәге ғаиләләргә ярҙам йөҙөнән ойошторолған “Дармарка”, “Йөрәктәрҙе үҙ ҡулыбыҙ менән йылытайыҡ” тип аталған хәйриә акцияларында әүҙем ҡатнашҡандарҙы ойошманың рәхмәт хаттары менән бүләкләне. “Түңәрәк өҫтәл” ултырышын балалар баҡсаһы педагогтары һәм тәрбиәләнеүселәре сығышы менән тамамланды.