Сара бөтәһенә лә оҡшаны

Үҙәк китапханала асылған “Бөтәһе менән бер тиң” клубында һаулыҡ мөмкинлектәре сикләнгән балалар һәм уларҙың атай-әсәйҙәре өсөн байрам ойошторолдо.

Унда килгәндәрҙең бөтәһе лә Светлана Козырева, Лариса Осовик, Әлфиә Усманова әҙерләгән “Әкиәттәр донъяһына сәйәхәт” викторинаһында әүҙем ҡатнашты. Балалар-үҫмерҙәр ижад һарайы коллективы сығышы сараға дәрт өҫтәне. Шулай уҡ кескәйҙәр һыуҙа һүрәт төшөрөү техникаһы менән танышты. Инвалидтар ойошмаһы рәйесе Ринат Дәүләтшин, үҙәк китапхана, хәйриә сараларына ҙур иғтибар бүлгән “Гармония” халыҡты социаль хеҙмәтләндереү үҙәге коллективы бүләктәр таратты.

Байрамдан һуң бер кем дә ҡайтырға ашыҡманы. Балалар ҙа, атай-әсәйҙәр ҙә ошондай саралар күберәк булыуын теләп таралышты.