Мәрхәмәтлелек - уларҙың ҡанында

Донъя шулай ҡоролған: тормош әҙәм балаһына һынауҙарҙы тигеҙ генә бүлеп бирмәй. Көслө рухлы кешеләр ул ҡаршылыҡтарҙы еңеп сыға, уға дуҫтары, туғандары ярҙам итә. Ҡайһы бер осраҡта, киреһенсә, иң яҡын тип һанағандары ла ауырлыҡтарҙан ҡурҡып ҡаса. Таянырлыҡ яҡындары булмаған кеше албырғап ҡала, ул йәмғиәт ярҙамына мохтаж. Яр һалып , бәлә һалып йөрөмәһәләр ҙә, ҡалабыҙҙа ла һаулығы насар булыу сәбәпле мөмкинлектәре сикләнгән балалар бар. Аллаға шөкөр, киң күңелле, рухлы, мәрхәмәтле, изге кешеләр ҙә етерлек. Мәләүез, Стәрлетамаҡ, Салауат, Ишембай ҡалаларынан, Талбаҙы ауылынан инициатива төркөмө “Рәхмәт” (“Благо Дарю” ) социаль әһәмиәтле проекты булдырып, үрҙә әйтелгән ҡала-райондарҙа ярҙамға мохтаж балаларға, уларҙың ата-әсәһенә, торлаҡтары янып, урамда тороп ҡалғандарға ярҙам ҡулы һуҙа.