Мәләүездә туризм яңы башланғыс ала

Бөтә донъя туған телдәр көнө билдәләнгәндә “Башҡортостан “ милли парк биләмәһендә урынлашҡан Ырғыҙлы, Һәргәй, Иштуған ауылдарында “Урал батыр” фольклор байрамы уҙҙы. Сараның маҡсаты -“Урал батыр” эпосында кешенең тәбиғәт менән тығыҙ бәйләнеше, рухи бөтөнлөгө, донъяуи ҡанундарҙы тапшырыу маһирлығын күрһәтеү, башҡорттарҙың боронғо йолауи уйындарын пропагандалау, уларҙы үҫеп килгән быуынға еткереү. Урал батыр тәбиғәтте һаҡлауҙы васыят итеп тапшырған. Бөгөн был миссияны “Башҡортостан” милли парк белгестәре дауам итә. Биләмә туризм ныҡлы үҫешә. Бында иң мөһиме, тәбиғәткә зыян килтермәй, уны артабан да ҡомартҡы итеп тапшырыу күҙ уңында тотола.

Район республиканың көньяҡ зонаһында урынлашҡан һәм туризм үҫеше өсөн уңайлы. Нөгөш һыуһаҡлағысы, мәмерйә һәм тәбиғәт ҡомартҡылары, “Көнгәк” ҡурсаулығы, ”Башҡортостан” милли паркы, Воскресенский картиналар галереяһы, “Воскресенский баҡыр иретеү заводы” сәнәғәт архитектураһы һәйкәле хатта сит төбәктәрҙә лә танылыу яуланы. Туристарға агротуризм, ял базалары, туристик маршруттар буйынса сәйәхәт ойошторола.

Айра Салауатова.