Мәләүез йылғаһы ярын нисек күҙ алдына килтерәһегеҙ?

Бәләкәй ҡалаларҙа уңайлы мөхит булдырыу буйынса бөтә Рәсәй конкурсында еңеп сыҡһа, тиҙҙән Мәләүез йылғаһы яры ҡала халҡының иң яратҡан, иң күп кеше йыйылған урынға әйләнергә мөмкин.

Үҙәк баҙарҙан спорт һарайына тиклем арауыҡты заманса төҙөкләндереү күҙаллана. “Һыу ҡапҡалары” проекты әгәр конкурс һынауҙарын уңышлы үтһә, яр буйында төрлө йәштәгеләрҙең ялын файҙалы һәм күңелле ойоштороу өсөн бөтә шарттар булдырыласаҡ. Һаулыҡ һәм физик мөмкинлектәре сикләнгән граждандарға ла уңайлы, ҡаршылыҡһыҙ мөхит буласаҡ. Айырыуса балаларға оҡшарға тейеш, сөнки уларҙың биләмәне формалаштырыуға индергән тәҡдимдәре лә иҫәпкә алынды.

Тиҙҙән унда балыҡ тота торған урын, байдаркала йөҙөү, галерея, пленэр, фонтан, велосипед менән йөрөү урыны, фотоға төшөү майҙаны, бәүелсәктәр була тиһәләр, ышанаһығыҙмы?